Abu Raafe' ke qatl ka waqi’ah:Abu Rafe‘ ke qatl ka tafseeli waqi’a Imam Bukhari ne riwayat kiya hai woh ye hai.
Hazrat Bara’ bin ‘Azib radhi Allahu anhu ne bayan kiya ke Rasoolullah Sallallahu alaihe wasallam ne Abu Rafe‘ Yahudi (ke qatl) ke liye chand Ansari sahaba ko bheja aur Abdullah bin Atik ko unka ameer banaya. Yeh Abu Rafe‘ Nabi Kareem Sallallahu alaihe wasallam ko takleef diya karta tha aur aap ke dushmanon ki madad kiya karta tha. Hijaz me iska ek qila tha aur wahin rehta tha. Jab yeh log us qile ke qareeb pahunche to sooraj ghuroob ho chuka tha aur log apne jaanwar lekar gharon ko ja chuke the.
Abdullah bin Atik ne apne saathiyon se kaha: Tum log yahin ruko, main (qile ki taraf) ja raha hoon aur darban ko chalak tariqe se sulook karunga taake main andar jaane me kamyab ho jaun. Chunanche woh qile ke paas aaye aur darwaze ke qareeb pahunch kar kapron me khud ko is tarah chhupa liya jaise koi qaza-e-haajat kar raha ho.
Qile ke tamam log andar dakhil ho chuke the. Darban ne awaz di,Aye Allah ke bande! Agar andar aana hai to jaldi aa ja, main ab darwaza band karne ja raha hoon.To main bhi andar chala gaya aur chup kar uski karwai dekhne laga. Jab sab log andar aa gaye to usne darwaza band kiya aur kunjiyon ka guchcha ek khunti par latka diya.Maine in kunjiyon ki taraf badh kar unhein le liya aur qile ka darwaza khol liya. Abu Rafe‘ ke paas raat ke waqt kahani sunayi ja rahi thi aur woh apne khaas baala-khane me tha. Jab kahani sunane wale wahan se uth kar chale gaye to main us ke kamre ki taraf charhne laga. Is dauraan me jitne darwaze main kholta tha unhein andar se band karta jata tha. Mera maqsad yeh tha ke agar qile walon ko mere baare me kuchh maloom bhi ho jaaye to tab tak woh mere paas na pahunch saken jab tak main usay qatl na kar lun. Aakhir main us ke qareeb pahuncha. Woh ek andhere kamre me apne biwi bachchon ke darmiyan (soya) hua tha. Mujhe andaza na ho saka ke woh kahan hai. Isliye maine pukara: “Ya Aba Rafe’!” Woh bola “Kaun hai?” Main awaz ki taraf badha aur talwar ki ek zarb lagayi. Mere dil ki dhadkan tez thi, isi wajah se main uska kaam tamam na kar saka. Woh cheekha to main kamre se bahar aa-gaya. Thodi der thehra raha phir dubara andar gaya aur awaz badal kar puchha: “Abu Rafe’! yeh awaz kaisi thi?” Woh bola: “Teri maa barbād ho! Abhi abhi kisi ne talwar se mujh par hamla kiya hai”.Main ne phir ek zarb aur lagayi, zakhmi to bahut kar diya lekin woh mara nahi. Phir maine talwar ki nok uske pait me rakh kar dabayi jo uski peeth tak pahunch gayi. Ab mujhe yaqeen ho gaya ke main ne usay qatl kar diya. Main ne darwaze ek ek kar ke kholne shuru kiye. Aakhir ek zine par pahuncha, samjha ke zameen par pahunch gaya hoon lekin abhi nahi pahuncha tha. Maine zine par pair rakha to neeche gir pada. Chandni raat thi. Girne se meri pindli toot gayi. Main ne apne imame se bandha aur aa kar darwaze par baith gaya. Is irade ke saath ke yahan se tab tak nahin jaunga jab tak maloom na ho jaaye ke woh mara ya nahi.
Jab murgh ne awaaz ki to qile ki fasil par ek pukarne wale ne awaz di: “Ailan karta hoon ke Abu Rafe’, tajir-e-Hijaz, mar gaya.” Main apne saathiyon ke paas aaya aur bola: “Chalo! Jaldi karo. Allah Ta’ala ne Abu Rafe’ ko qatl kar diya.” Phir main Nabi Kareem Sallallahu alaihe wasallam ki khidmat me hazir hua aur aap ko khabar di. Aap Sallallahu alaihe wasallam ne farmaya:Apna paaon phailaao. Main ne paaon phailaya to aap Sallallahu alaihe wasallam ne us par apna mubarak hath phera. To paaon bilkul theek ho gaya jaise kabhi koi takleef hua hi na ho.[Sahih Bukhari, Kitab-ul-Maghazi, Bab Qatl Abi Rafi‘ Abdullah bin Abi Al-Haqeeq, Hadees: 4039]
Upar bayan ki gayi riwayat me Abu Rafe’ ke jurm ko mukhtasar taur par do lafzon me bayan kiya gaya hai ke “woh Rasoolullah Sallallahu alaihe wasallam ko takleef diya karta tha aur aap ke dushmanon ki madad karta tha.” Lekin kutub-e-tareekh ki tafseel se maloom hota hai ke uske iraade nihayat khatarnaak the, woh musalsal Islami riyasat ke khilaf saazishon me laga rehta tha aur poori koshish karta tha ke Madina ki Islami hukoomat ko mitaa diya jaaye.
Jang-e-Ahzab jis me Quraish aur tamam Arab qabeele ittehad karke Madina par hamla aawar hue the, yeh bhi isi Abu Rafe’ ki koshish se hua tha.Aur bawajood is ke ki yahudiyon ka musalmano ke saath aman ka muaahida (contract) tha,Us ne is jang ka kharcha uthaaya aur lashkar ki tayyari me bhar-pur madad kiya tha.Jab uski fitna angeezi had se badh gayi to qabila khazraj ke kuchh sahaba ne ye socha ki is fitne ki aag ko hamesha ke liye bujha di jaae.Un ki khawahish par Huzur Sallallahu alaihe wasallam ne ansaari sahaba ka ek dasta,Hazrat Abdullah bin Atik ki qayadat me bheja,Aur unhone badi hoshiyari aur bahaaduri se is fitne ki aag ko hamesha ke liye bujha diya.
Justice Pir Muhammad Karam Shah Azhari Abu Rafe’ ki ftina angezi aur musalmano ke saath dushmani ke baare me likhte hain:
“Abu Rafe’ un logo me se tha jinki koshisho aur ubhaarne se Makka ke quraish aur Arab ke dusre qabile ne ek badi lashkar ke saath Madina par hamla kiya aur kayi dino tak Madina ko gher rakha tha.Ye lashkar musalmano ko bilkul nist-o-naabood kar dene ki niyat se Madina par hamla kiya tha.Abu Rafe’ ne is jang me kaafiro ke na-kaam ho jaane ke baad bhi us ne Islam aur musalmano ke khilaf apni kaarwaayi jaari rakha aur Arab ke qabilo ko musalmano par hamla karne ke liye bharkaata raha.Uski ye karwaayi Islamic state Madina ke khilaaf khula hua Elaan-e-Jang tha.Aur jo dushman musalmano ke khilaaf jang karta hai,Musalmano ko hukm hai ki woh bhi uske khilaaf jang Karen.Huzur Sallallahu alaihe wasallam ne uski puri qaum par aam hamla karne ke bajaae sirf kuchh sahaba ko bhej kar us bad-bakht ko qatal karwa-diya taaki ziyadah khoon kharaba na ho.Abu’Rafe’ ne jo raasta apnaya tha uska anjaam wahi ho sakta tha jo huwa.Mujrim ko jurm ki saza mile to us anjaam ka zimmedar woh khud hota hai,na ki uske khilaaf qaanuni karwaayi karne wale”. [Ziyaun Nabi,Vol:7,Page No.609]
Abu’Rafe’ ki Islamic State Madina se bagawat wale kirdaar ko khud European historians bhi maante hain.
Lane Poole is baat ka iqraar karte hue apni kitab “Studies in a Mosque” ke page 67 par likhte hain:
“Un logo ke khilaf chhup kar karwaayi ki wajah is qadar saaf hai ki bayan karne ki zarurat nahi,Madina me na koi police thi nahi aam qanooni adaalat aur nahi fauji adaalat,Is wajah se Mohammad (Sallallahu alaihe wasallam) ke kuchh sahaba ko hi sazaa-e-maut naafiz karna parta tha,Aur yahi behtar tha ki ye kaam khaamushi se anjaam paana chaahiye tha,Kyunki kisi shakhs ko uske qabile ke saamne sar-e-aam sazaa-e-maut dena ziyadah jhagda,khoon-rezi aur inteqaam ka sabab banta yahan tak ki pura shahar is me mubtala ho jaata”. [Bahewala,Mutoon-e-Hadees par jadid zehan ke ishkaalat,Writen by:Dr Mohammad Akram work,Page No.284]
Khulasa-e-kalaam ye hai ki Abu Rafi‘ ka Islami riyasat aur musalmano ke khilaf jo baghiyana kirdar tha .Wahi kirdaar kisi bhi shakhs ka kisi bhi satate ke khilaaf ho to uski saza qatl ya phaansi hi hoti hai. Is liye is waqi’a ki buniyad par Nabi Kareem Sallallahu alaihe wasallam ki zaat-e-paak par koi etiraz karna apni hi aqal ka mazaaq udaane ke barabar hai.
Share........

Related Topics

Begair dekhe Allah ko kaise maane? Quran me kaafiro ko qatal karne ka hukm? Islam me parda kyun? Qurbani me jaanwaro ko kaat kar kya faaida? Ek se ziyadah shadi,Aurato ke saath naa-insaafi hai? Islam me talaaq kyun? Islami sazaayen insaaniyat ke saath zulm hai? Murtad ki saza qatal kyun? Huzur ﷺ par aatank aur be-rahmi ka ilzam Yahudi Sardar Abu Raafe' ka qatal? Qabila Ukal Ya Urainia Ke Logo Ko Dard-naak Saza